Fellabakarí

Alveg finnst mér merkilegur andskoti hvað Fellabakarí, það annars ágæta bakarí, er blint á smáatriðin.

Sem dæmi má nefna pulsubrauðin.

Af hverju í andskotanum geta þeir ekki skorið brauðin? Ég veit ekki um neina aðra pulsubrauðaframleiðendur sem selja brauðin óskorin. Ég er nú ekki að biðja um neina vorkunn yfir að þurfa að skera brauðin sjálfur en þeim er sannarlega engin vorkunn í því heldur. Það getur nú varla verið svo mikið mál.

Svo eru það brauðpakkningarnar.

Allir brauðframleiðendur sem ég man eftir setja svona klemmu á brauðpokana (hvítu klemmurnar með dagsetningunni á).

En nei. 

Fellabakarí þrjóskast við og setur eitthvað ótætis límband á pokann. Vita þeir ekki að klemman er krúsjal atriði til að halda brauðinu fersku sem lengst? Þegar ég er búinn að fá mér af brauði sem kemur í klemmupoka þá set ég klemmuna aftur á. Þannig helst brauðið mikið ferskara heldur en ef maður snýr upp á pokaopið. Ég veit ekkert af hverju það er, en það er bara þannig.

Ekki nóg með að þeir setji ekki klemmu heldur troða þeir pokana svoleiðis út að þegar maður er búinn að naga þetta einnota límband af og fær sér eina brauðsneið þá er enn það lítill afgangur af pokanum til að loka honum að maður vildi óska þess að einhverjum himbrimanum í Fellabakaríi hafi dottið í hug að setja klemmu á skrambans pokann.

En brauðin eru fín.

Gáta dagsins:

Hver sagði þessa ódauðlegu setningu og af hvaða tilefni?:

"Margir hafa ekki gert magaæfingar síðan á Eiðum '64.."

Svara í kommentin.

Egils djús

Ég hef orðið var við að gert sé grín af því að ég kaupi djús, þ.e. Egils þykkni.

Mér er andskotans sama.

Mér finnst þetta fínn drykkur og ekkert verri en hver annar.

Og hana nú!

Ólafur fer á Subway

Ég hef þrisvar sinnum farið í nýja verslun Subway á Egilsstöðum. Ég fagna að sjálfsögðu að þessi keðja skuli vera komin í Egilsstaði enda án efa einn besti skyndibiti sem völ er á. Það er þó þannig að starfsfólk útibúsins er ekkert til að hrópa húrra fyrir. Þjónustulundin er alls ekki staðar og hreyfigeta afgreiðslufólksins á við 2ja ára ungabarn.

Afgreiðslan er eitthvað á þessa leið;

Brauðafgreiðslumaður: Get ég aðstoðað?
Ólafur: Já, ég ætla að fá tvo "12 bræðinga í parmesan og hita báða
Brauðafgreiðslumaður: (Sækir brauðin tvö) Tvö brauð?
Ólafur: Já
Brauðafgreiðslumaður: Tólf tommu?
Ólafur: Já
Brauðafgreiðslumaður: Hvað má bjóða þér?
Ólafur: Uuuu... bræðing.
Brauðafgreiðslumaður: Í bæði brauðin?
Ólafur: Já
Brauðafgreiðslumaður: (Klárar að setja bræðing í brauðið) Hita eða rista?
Ólafur: Uuu.. hita.
Brauðafgreiðslumaður: Báða?
Ólafur: Já takk.
Grænmetisafgreiðslumaður: Grænmeti?
Ólafur: Í annan þeirra ætla ég að fá kál, rauðlauk og papriku
Grænmetisafgreiðslumaður: (Klárar að setja kál) Eitthvað fleira?
Ólafur: Já, rauðlauk og papriku
Grænmetisafgreiðslumaður: (Klárar að setja rauðlauk) Fleira?
Ólafur: Já, papriku
Grænmetisafgreiðslumaður: Einhverja sósu?
Ólafur: Já, majones og sætt sinnep og salt og pipar
Grænmetisafgreiðslumaður: (Klárar að setja majones) Sinnep?
Ólafur: Já, sætt
Grænmetisafgreiðslumaður: Salt og pipar?
Ólafur: Já
Grænmetisafgreiðslumaður: Og í hinn?
Ólafur: Ég ætla að fá kál, rauðlauk og gúrku
Grænmetisafgreiðslumaður: (Klárar að setja kál) Eitthvað fleira?
Ólafur: Já, rauðlauk og gúrku
Grænmetisafgreiðslumaður: (Klárar að setja rauðlauk) Fleira?
Ólafur: Já, gúrku takk
Grænmetisafgreiðslumaður: Sósu?
Ólafur: Já, majones og Honey mustard
Grænmetisafgreiðslumaður: (Klárar að setja majones) Honey mustard?
Ólafur: Já, takk
Kassafgreiðslumaður: Hvað varstu með?
Ólafur: Tvo bræðinga
Kassafgreiðslumaður: Tvo?
Ólafur: Já
Kassafgreiðslumaður: Eitthvað fleira?
Ólafur: Já, hálfslíters kók light
Kassafgreiðslumaður: Light?
Ólafur: Já takk
Kassafgreiðslumaður: Það gera 1.980 kr.
Ólafur:(Réttir kortið)
Kassafgreiðslumaður: Viltu afrit?
Ólafur: Nei takk
Kassafgreiðslumaður: Gjörðu svo vel
Ólafur: Takk kærlega

Af þess má sjá að það borgar sig alls ekki að segja tvo eða fleiri hluti við afgreiðslufólkið í einu. Það getur greinilega bara meðtekið einn hlut og það hefur ekkert skánað í hvert skipti sem ég kem í verslunina. Ég hélt nefnilega að maður myndi flýta fyrir afgreiðslu að segja allt í einu í hvert skipti en svo er alls ekki. Svo spyrja þeir á Egilsstöðum aldrei eins og fyrir sunnan; Taka með eða borða hér? , sem þýðir að þú færð aldrei poka ef þú ætlar að taka með og þarft því að biðja um hann sérstaklega.

En hvað sem öðru líður eru bátarnir alveg jafn góðir þrátt fyrir athyglisverða afgreiðslu og það er nú það sem skiptir mestu máli.