Boston Legal

Ég hef reynt ýmsilegt til að reyna að skilja hvað menn sjá við hinn geysivinsæla lögfræðiþátt, Boston Legal. Ótrúlegustu menn (það eru þeir sem ég þekki og hef hingað til haldið að væru með sæmilegan húmor) sjá ekki sólina fyrir Denny Crane, leikinn af William Shatner og Alan Shore sem er leikinn af James Spader. Ég get alveg lagt mig fram við að reyna að brosa að Denny Crane og finnst hann meira að segja stundum nokkuð hnyttinn. En Alan Shore get ég engan veginn skilið. James Spader er gjörsamlega vonlaus leikari, hefur alltaf verið og er sá síðasti sem ég get sagt að sé fyndinn. Þessi leikari lék í óendanlega mörgum B-myndum hér áður fyrr og var sjálfsagt ágætur sem slíkur. 

Þetta er fyrir mér svona svipað og að taka Ívar Guðmundsson eða Ásgeir Kolbeinsson og gera þá að einhverjum gamanleikurum. Það getur bara ekki gengið upp. Eða hvað? Það gekk upp með James Spader. Kannski eru Íbbi og Geiri fínn efniviður í íslenskan lögfræðigrínþátt. Ég kem svosem ekki til með að hlæja að honum en ef ótrúlegustu menn geta hlegið að James Spader þá ætti þetta að vera skothelt. 

Ég tel mig vera nokkuð vel til þess fallinn að greina á milli þess sem er fyndið og þess sem er ekki fyndið. En þarna er sennilega undantekningin sem sannar regluna. 

Athugasemdir

[Jens Guð, 24.6.2007 kl. 23:46]

  Ég verð seint talinn aðdáandi Hollywood-klisja,  hvort sem í kvikmyndum eða sjónvarpsefni.  Af reynslu forðast ég eins og heitan eld bandaríska grínþætti og dæmigerðar bandarískar kvikmyndir.  Þess vegna þekki ég ekkert til leikaranna í BL.  Þannig að ferill þeirra truflar mig ekkert.

 En nýverið sá ég út undan mér bút úr einum BL þætti.  Þar var sitthvað kjánalegt sem maður kannast alltof vel við úr bandarískum gamanþáttum.  En jafnframt var áhugavert að ég kannaðist við glæpamál sem hafði átt sér stað í raunveruleika og ég hafði lesið um.  Þátturinn byggði að hluta á raunverulegu réttarhaldi í því máli. 

  Eftir það fór ég að fylgjast með fleiri BL þáttum.  Ég hef kannast við fleiri mál sem þar eru tekin fyrir og byggja á réttarhöldum um raunverulega glæpi.  Það er hægt að dást að sumum þeim rökum og sálfræðilegum fléttum sem beitt er í slíkum réttarhöldum.

  Þar við bætist að það slæðast með lúmskir brandarar og forvitnilegar upplýsingar í BL innan um bullið og aulahúmorinn. 

  Í þættinum á Ská einum í kvöld var til að mynda komið inn á það hvaða aðferðum er beitt í spilavítum.  Eitt það merkast er að yfir gesti spilavíta er úðað hormónum sem heita ferónómar.  Það eru samskonar hormónar og framkalla móðurtilfinningu hjá konum og öðrum mæðrum í dýraríkinu gagnvart afkvæmum.  Hormónarnir leysa úr læðingi efnaboð í heilanum sem láta viðkomandi fyllast vellíðunartilfinningu og jákvæða afstöðu gagnvart umhverfinu og því sem verið er að fást við. 

  Ferónómarnir eru svo öflugt fyrirbæri að séu 5 auðir stólar á biðstofu og einn sé úðaður með ferónómum þá sest viðskiptavinurinn í 100% tilfella í ferónómastólinn.  

  Á sólbaðsstofum fást ferónóma krem sem heita Embrace.  Samkvæmt vísindalegri rannsókn sem BBC stóð að eykur kremið aðdráttarafl þess sem ber það á sig um 83% gagnvart hinu kyninu.

  Farandsölumenn (door to door) sem bera á sig Embrace auka sölu um 25%   

[Ólafur Bj. (IP-tala skráð) 25.6.2007 kl. 16:47]

Ég skal viðurkenna að ég þekki ekki til þeirra mála sem í þættinum eru enda á ég erfitt með að einbeita mér að því að fylgjast með þar sem James Spader fer svona hryllilega í taugarnar á mér. Sem er kannski synd því það má vera að þættirnir séu vel skrifaðir og vel að þeim staðið enda virðist það vera raunin eftir því sem þú segir.

Fyrst og fremst hélt ég að þetta ættu að vera grínþættir enda mikið til auglýstir sem slíkir.

En ég þakka greinagóðar upplýsingar og þakka kommentið.