Rigning

Það hljóta að vera einhver takmörk fyrir því hversu mikið getur rignt á þessu skeri.

Skrifstofan mín á hreppnum míglekur, eða annar glugginn réttara sagt. Tékkaði á ástandi gluggans þegar ég mætti í morgun og það var fínt. Klukkutíma síðar var það líka fínt, bara smá leki. Klukkutíma eftir það mætti Sveinn Kristján Ingimarsson til mín og var eitthvað að blaðra þegar allt í einu heyrist í honum... "neinei!...". Og þá tókum við eftir því.

Þá hafði ekki lekið heldur fossað inn um gluggann án þess að ég hefði tekið eftir. Kominn var stór pollur á gólfið. Fyrir neðan gluggann er tölva, fjöltengi, fullt af köplum, switch og þess konar drasl. Það slapp nú blessunarlega allt nema switchinn en hann hefur ekki slegið feilpúst þrátt fyrir baðið.

Nú er það orðið mitt aðalstarf að vinda úr viskastykkjunum sem ég kom fyrir í glugganum.

Sérdeilis ekki slæmt starf það.

Athugasemdir

[Þorkell (IP-tala skráð) 31.10.2007 kl. 11:46]

Ég veit nákvæmlega af hverju þetta er.  Ég man vel eftir því þegar var verið að endurbyggja Geysi.  Hann var færður um einhverja 10 metra og notaður hluti af gamla grunninum.  Þegar verið var síðan að rífa geysi, var allt rifið nema ein spýta, svo hægt væri að fá styrk úr endurbyggingasjóð einhverjum að viðbættum styrkjum úr húsfriðunarnefnd o.þ.h.  Ég man að Trésmiðirnir Sigvaldi í Urðateigi, Ágúst Guðjóns og Gautur í Hamarsseli voru að endurreisa þennan skúr.  Ég held að Ágúst hafi verið búinn að átta sig á því að Birgir, sonur hans, yrði í þorparastarfinu þar til álverið væri komið í gang.  Reyndar var ekki búið að ákveða þetta, en Ágúst er þekktur fyrir að sjá fram í tímann.  Hann ákvað þá að glugginn skyldi fara að leka haustið 2007. Hringdu í Ágúst og skammaðu hann.  Spurðu líka fyrir mig hverjar lottótölurnar verða í næstu viku.

Þessi brandari var fyndnari í höfðinu á mér en í rituðu máli. 

[Ólafur Björnsson, 31.10.2007 kl. 16:07]

Hann var alveg ágætur